Өткен ғасырдың басындағы азамат соғысы жылдарында қазақ даласындағы саяси жағдай мен қазақ қызының қилы тағдырын негізгі арқауы еткен «Ақбілек» романы – қазақ әдебиетіндегі тұңғыш психологиялық роман. Романның негізгі кейіпкері, ақ, қызыл болып бөлінген саяси қарсыластар салған зобалаңның құрбаны болған Ақбілек біраз қиындық көріп, тағдырдың басқа салғанына көнуге мәжбүр болады. Ақтар ете-жеңін жия алмай қашқан кезде елге оралған Ақбілек өгей шеше Өріктің қысастығын көріп, тауқымет тартады. Мінезді, діттегеніне жетпей қоймайтын қайсар қыздың кейінгі өмірін де аса қызық, тартымды баяндаған жазушы Ақбілек образы арқылы алмағайып заманда тағдыры қақпақылға түскен қазақ қыздарының ғана емес, халық өмірі мен тұрмысын шынайы суреттеген.