Мағжан Жұмабаев есімі әдебиет сүйер қауымға жақсы таныс. Оның қазақ халқының рухын ояту жолында жазған жалынды жырлары мен өзінің ғашықтарына арнап жазған назды өлеңдерін тебіренбей, сезімге берілмей оқымау мүмкін емес. Оның эпикалық шығармалардың ізімен жазған дастандары мен әлем әдебиетінің озық үлгілерінен жасаған тәржімалары бүгінгі қазақ әдебиетінің асыл қазынасы. Ақын қай тақырып төңірегінде қалам тербесе де, жыр қазынасы ашылғандай барынша төгіп, тереңнен толғап жазады. Әсіресе, өзінің саяси көзқарастарын өлең сөзбен өрнектеп беруі шынайылығымен құнды. Ол – өз ұлтын сүйген, түркі дүниесінің рухани тұтастығын ойлаған жан. Сондықтан да ақын өлеңдерінің бүгінгі оқырманға берері де мол.