«Жетпіс бап» атты жинақта М.Ж. Көпейұлы Алланың әлемді, барша тіршілік атаулыны, тозақ пен жұмақты жаратуы, ардақты пайғамбарымыз Мұхаммед (c.ғ.c.) өмір жолын барынша терең сипатта жырлаған. Мәшһүр Жүсіп Көпейұлы «Жетпіс бапта» Ислам дінінің ақиқаттылығы, құндылығы, қадір-қасиеті, адамзат өміріндегі пайдалары уағыздалған. Оның тақырыптарының басты нысанасы дін, ал ақын сол дін тақырыптарын жеңіл, түсінікті, өз еліне қолайлы поэзия тілімен мүмкіндігінше жеткізуге тырысқан. Құран сүрелері мен Мұхаммед (с.ғ.c.) пайғамбарымыздың хадистерін өзінің мысалдары арқылы бейнелеген. Жалпы дінді әдебиет арқылы насихаттаудың өзіндік даму жолдары мен ерекшеліктері бар, ал осы мәселеге Мәшһүр-Жүсіп Көпейұлы зор үлесін қосқан қаламгер.